لمسه مصرية (الاسرة السعيدة)


أسبوعيات عاطله" الجزء الأول"


شجرة الإعجاب8إعجاب
  • 1 Post By ابن الحتة
  • 1 Post By ابن الحتة
  • 1 Post By ابن الحتة
  • 1 Post By ابن الحتة
  • 1 Post By ابن الحتة
  • 1 Post By بتول
  • 1 Post By الاسكندراني
  • 1 Post By ابن الحتة

إضافة رد
 
LinkBack أدوات الموضوع انواع عرض الموضوع
قديم 18-03-2020, 03:30 PM   #1


الصورة الرمزية ابن الحتة
ابن الحتة غير متواجد حالياً

بيانات اضافيه [ + ]
 رقم العضوية : 3325
 تاريخ التسجيل :  Oct 2013
 المشاركات : 6,662 [ + ]
 التقييم :  3548
تلقيت إعجاب : 2146
 الدولهـ
Egypt
 الجنس ~
Male
 MMS ~
MMS ~
 اوسمتي
العطاء الوسام الذهبي الحضور المتميز 
لوني المفضل : Teal

اوسمتي

افتراضي أسبوعيات عاطله" الجزء الأول"










اسبوعيات عاطله لاتكل ولا تمل

وفى صباح اليوم الاول من الاسبوعيات

استيقظت بكل حيويه ونشاط

احلام بطلة الاسبوعيات

وكانت تنام مبكرا وتستيقظ مبكرا

مش عشان ما اتعودتش تسهر

ولا انها من محبى برنامج صباح الخير يا مصر

ولا طموحها انها تبيع لبن

لكن عشان تلحق تقرأ الاعلانات فى الجرايد والمجلات

ولتكون أول من يقرأها

وتلحق الوظيفه قبل منفسينها من العاطلين والعاطلات"



أحلام: استعنا على الشقا بالله يا مسهل



"وقبل ما تفتح الجرنال تدعى دعاءها اليومى "

احلام: اللهم ارزقنى وظيفة تكون حلوه ولطيفه
أو حتى سخيفة
بس تكسر النحس وتزيح الغمه
وأحس بأه انى ليا لازمه

"وكانت هذه أول مكالمه"



أحلام:السلام عليكم

"يرد عليها أحد الموظفين يبدو على صوته ان أحلام أيقظته
من النوم فقد كان لا يهمها إن كان اليوم جمعه أو سبت
المهم تحصل على الوظيفه بأسرع وقت"



الموظف النائم: وعليكم السلام

أحلام: كنت قريت فى الجرنال ان عندكم وظايف خال..

"وقبل ان تكمل احلام الكلام "

الموظف: انهارده أجازه..اتصلى بكره



"تغلق السكه فى وجه احلام"

أحلام"بكل تفاؤل": كويس جدا كده هيعرفوا انى نشيطه

وبصحى بدرى حتى فى الاجازات...
بس يا خوفى لايشغلونى مكان البواب ما هو اللى بيشتغل فى الأجازات
ويقولوا عليا سيكيورتى ويلبسونى قميص لبنى وكاب ...
وأدى النمره اللى بعدها



الموظفه: ألو

أحلام: السلام عليكم قريت انكم طالبين موظفين هنا

الموظفه : الشغلانه دى عشانك

احلام"فى نفسها": امال يعنى عشان اطمن على مستقبل عاطلين مصر

احلام: اه عشانى

الموظفه: اه بس للأسف الاعلان طالب موظفين شباب ولاد يعنى

أحلام: طب ما عندكمش اى حاجة للبنات

أحلام"فى نفسها":والله ابلغ عندكم جمعيات حقوق المرأه

الموظفه"بشئ من الشفقه وكأنها تعلم بما تواجهه احلام":
لأ يا حبييتى ربنا يوفقك



" اما عن باقى الاعلانات فكان أغلبها كالتالى
مطلوب للعمل بأحدى الشركات ....

هذه فقط مقدمة الاعلان دعونا نتعمق قليلا فى الاعلان...
يشترط خبرة "2-5-7"سنوات على الاقل فى نفس المجال"



أحلام: ما انا خبره فى الكليه خمس سنين وكمان خبره فى البحث

عن وظايف سنه لدرجة انى بقيت امسك الجرنال أقرا صفحة الرياضه
ومن عدد الاهداف اعرف الجرنال ده فيه كم شركه هيقولولى ابعتى
على الايميل ومش هيعبرونى وكم شركه هتقفل فى وشى التليفون
زى ما يكونوا بيعملوا تعداد للعاطلين فى مصر والاعلانات ديه تمويه



"وبعد ان انتهت من الجريدة جاء وقت البحث على النت

حيث كانت أحلام عضوه نشيطه فى كل منتديات البحث عن وظائف

وجروبات الياهوو والفيس بوك و لأن احلام مش عاطله أى كلام

فهى توسع مجال بحثها عن وظيفة بالبحث المستمر
عن جروبات التوظيف والاشتراك بها"



وكالعاده تبدأ بدعاء النت



أحلام: اللهم ان كان نصيبي ليس فى الجرنال فاجعله

يصيبنى من على النت كالفيروسات

ولا ينفع معاه لا انتى فيرس ولا فورمات

بسم الله نبدأ السيرش



"وكانت اول رساله مفجأه سعيده لأحلام ...بجد ولا فى الاحلام"



أحلام"تقرأ رساله من على ياهوو": فرص عمل لحديثى التخرج

الحمد لله كده ضمنا نتوظف



"وتفتح أحلام الرساله... فهل يا ترى ستجد ما تبغاه ام ستكمل
اسبوعياتها هنا بمشيئة الله"







Hsf,udhj uh'gi" hg[.x hgH,g"



 
الاسكندراني معجبين بهذا.
 توقيع : ابن الحتة

مواضيع : ابن الحتة



رد مع اقتباس
قديم 18-03-2020, 03:40 PM   #2


الصورة الرمزية ابن الحتة
ابن الحتة غير متواجد حالياً

بيانات اضافيه [ + ]
 رقم العضوية : 3325
 تاريخ التسجيل :  Oct 2013
 المشاركات : 6,662 [ + ]
 التقييم :  3548
تلقيت إعجاب : 2146
 الدولهـ
Egypt
 الجنس ~
Male
 MMS ~
MMS ~
لوني المفضل : Teal

اوسمتي

افتراضي رد: أسبوعيات عاطله" الجزء الأول"





أسبوعيات عاطله "الجزء الثانى



أحلام"تقرأ رساله من على ياهوو": فرص عمل لحديثى التخرج
الحمد لله كده ضمنا نتوظف
"وتفتح أحلام الرساله”
هكذا اختاتمنا الجزء الاول من الاسبوعيات
"تفتح أحلام الرساله لتجد العديد من الشركات..
على عكس كل التوقعات"
أحلام: مصر لسه بخير ..اُمال أزاى فى ناس مش لاقيه شغل
ما الوظايف هنا بالميات ده لو كل الوظايف ديه خاليه فعلا ده كده

احنا محتاجين نستورد عماله بأه


"وأخذت تقرأ أحلام ما تشترطه الشركات فى المتقدمين والمتقدمات
كانوا فعلا لايشترطون عدد سنين من الخبره ولكنهم كانوا يشترطون

الكثير من الكورسات..
وهى لا تعرف سوي ما خرجت به من الكليه من مهارات"
أحلام "تكلم نفسها": كان لازمتو ايه الدراسه بأه ووجع القلب
ده انا لو كنت خدت كورسات فى اى مجال لمدة سنه واحده
أحسن من الخمس سنين اللى قضيتهم فى الكليه ملهاش لازمه
أحلام"فى أمل مفتعل حتى لاتصاب باليأس و الاحباط":
كده من وسط العشر شركات ديه انا ممكن اتجرأ وابعت لشركه
او اتنين
من الشركات ديه ورغم انها مش فى مجال تخصصى إلا انها وظيفه

ممكن اشتغلها لحين ما انمى مهاراتى وأخد شوية كورسات
أحلام"تمسك ورقه وقلم":

كده بأه انا محتاجه عشان اشتغل أخد كورسات ايه......

"وكتبت أحلام لسته طويله من الكورسات ودخلت على أحد المنتديات

لتحميل أول هذه الكورسات على شكل فيديوهات"
"وبعد ان بعثت احلام - بالسي فى- بتاعها لبعض الشركات

نزلت مسرعه عشان تلحق تروح على أحد الملتقيات التوظيفيه
وتوزع - السي فى- بتاعها هناك حيث يوجد العديد من الشركات
لعلها تجد الفرصه هناك"
"وأعدت شويه فى الموصلات"
"تدخل أحلام الملتقى لتجد من الشركات ما لذ وطاب"
أحلام: دهب ياقوت مرجان ان حاسه انى على بابا وشكلى هحتاج
- سى فيهات- زياده للاربعين حرامى ..... أصدى للشركات ديه كلها
"تدخل أحلام على الشركه الأولى بكل تفاؤل ..... وهذا ما كان"

أحلام: السلام عليكم ممكن أعرف طالبين وظايف ايه بالظبط
الموظف:"بعد شرح طويل عريض ملوش لازمه وتصوير شركته

انها أجمد شركه"
أحنا عايزين مهندسين عماره ياريت لو تعرفى حد من أصحابك

ما اشتغلش تقوليلوا علينا وده الموقع بتاعنا ياريت يبعت عليه
أحلام"بشئ من الحقد على مهندسين عماره":
يعنى هما مهندسين عماره مستنيكم ده من بين كل تلت أعلانات فى الجرنال

فى خمسه منهم بيطلبوا مهندس عماره أو مدنى
"ولكن لم تخرج أحلام صفر اليدين من أول شركه فقد أخذت بنبونيه

من الموظف مكفأتاً لها على تحملها له للنهاية"
أحلام: مسيري هلاقى شغل ده أحنا اللى مشغلين الصين والفلبين
مش هنعرف نجيب شغل للمصريين
"وهذا ما كان فى اللقاء التانى"

أحلام: السلام عليكم ممكن أعرف انتم طالبين وظايف ايه
الموظف: احنا هنا مش عايزين نوظف حد
أحلام"فى نفسها": أمُال جاين تغيظونا..ولا بتدوروا

على شغل انتوا كمان
أحلام : امُال ايه
الموظف: أحنا هنا بندى كورسات بأسعار مخفضه ممكن تكتبلنا
ايميلك وهنبعتلك نشره بكل الكورسات اللى عندنا
"وخرجت أحلام بنوتة تليفونات هديه من هذه الشركه
وهكذا أستمر الحال مع أحلام تلف فى الملتقى وماحدش عايز
يجبر بخاطرها وياخد -السي في- من أيدها..
ولكنها كانت دوما لا تخرج خالية اليد ..
فقد كانت تخرج باللى فيه النصيب أما بكيس مناديل أو قلم أو بنبونيه ..
حتى أنجرفت أحلام وراء الهدايا وبدل ما تتخلص من - السي فيهات-
اللى معها رجعت ومعها حموله زياده من بنبونى وأقلام ومناديل"
أحلام "فى نفسها": والله الواحد طلع من الملتقى ده بأفكار بردوه ..
انا ممكن أبيع شوية الحجات اللى انا خرجت بها من الملتقى ده
على محطة المترو وكل واحد يشترى حاجه ياخد - سي فى-

هديه وبكده أخلص من - السي فيهات- اللى معايا
"وبعد ان عادت أحلام للبيت بعد يوم مُجهد طويل ولم تتخلص إلا
من - سي فى- واحد أذا بها تريح قدميها من المشواير

ولكن يبدو ان الراحه لاتجد لأحلام سبيل
حيث يرن الهاتف فتذهب أحلام لترد"
أحلام"تصرخ وهى سعيده": نمره غريبه...نمره غريبه

"فقد كانت أحلام تحب النمر الغريبه لعلها تجلب الوظيفه
التى تبدو حتى الآن بعيده"
أحلام: السلام عليكم
فتاه: وعليكم السلام انتى كنتى بعتى -السي فى- بتاعك لشركتنا
أحلام"فى نفسها": يمكن وانا يعنى مخى دفتر ...

انا أصلا نمرتى مع كل شركات مصر
أحلام: أيوه فعلا هو انا اللى بعت
الفتاه: طب ينفع تيجى تعملى معانا مقابله يوم التلات الساعه 2:00
أحلام "تفكر فى مخها": أتقل عليها ولا أوافق ...
فكرى بسرعه يابت يا حُلُم
أحلام: أه مفيش مشاكل خلاص يوم التلات ان شاء الله بس هى الوظيفه ايه

بالظبط
الفتاه: خدمة عملاء ...فى مشاكل
أحلام: لأ أبدا معادنا يوم التلات

"وكانت هذه المكالمه السبب فى رسم البسمة على وجه
أحلام قبل ما تدخل تنام"
"وهنا أدركت أحلام المساء فنامت تحلم بمقابلة يوم الثلاثاء

فهل يا ترى ستتحقق أحلامها أم ستستمر فى كتابة أسبوعياتها"




 
الاسكندراني معجبين بهذا.
مواضيع : ابن الحتة



رد مع اقتباس
قديم 18-03-2020, 03:49 PM   #3


الصورة الرمزية ابن الحتة
ابن الحتة غير متواجد حالياً

بيانات اضافيه [ + ]
 رقم العضوية : 3325
 تاريخ التسجيل :  Oct 2013
 المشاركات : 6,662 [ + ]
 التقييم :  3548
تلقيت إعجاب : 2146
 الدولهـ
Egypt
 الجنس ~
Male
 MMS ~
MMS ~
لوني المفضل : Teal

اوسمتي

افتراضي رد: أسبوعيات عاطله" الجزء الأول"




أسبوعيات عاطله "الجزء التالت"

"تستيقظ أحلام من النوم مبكرا زى كل يوم لكن هذا اليوم ليس
كأى يوم فهو يوم الثلاثاء حيث ستحظى أحلام بأول مقابله
لها على الأطلاق"
"بعد ما فطرت أحلام دخلت على النت عشان تعرف ايه المطلوب
لتفوت من الانترفيو بسلام"
توصل أحلام للعنوان وكانت جايه بدرى كمان فتلف شويه فى المكان حتى بقى

على معادها عشر دقايق تمام تطلع فى الاسانسير"

أحلام: السلام عليكم انا عايزه أطلع للدور ال17
عامل الاسانسير:انتى طالعه تقدمي على شغل ولا ايه
أحلام: اه باين عليا ولا ايه
عامل الاسانسير: ربنا يوفقك هما بيوظفوا ناس كتير ان شاء الله

تلاقى وظيفه
أحلام: يـــــارب

"أحلام توصل فى ميعادها تمام و هذا ما كان"
أحلام :السلام عليكم كنتم كلمتونى عشان أعمل انترفيو انهارده
موظف الاستقبال: مين اللى كلمك بالظبط
أحلام "فى نفسها " : من الأول كده مفيش مصدقيه فى كلامى...
شكلى لازم أشد عليهم شويه
أحلام : استاذه دينا
موظف الاستقبال: طب أتفضلى ارتاحى شويه


"تجلس أحلام بجوار أحد المتقدمين اللى بردوه لدورهم مستنين وكعادتها
تبتسم أحلام لعلها تجد فى المتقدمين من يبادلها الابتسام فتتكلم معه
ليقل توترها وتشعر بالأطمئنان ولكنها تجد مقابل بسمتها نظرات جامده
فتختفى البسمه من على وشها أوام "


أحلام"فى نفسها": اه شكلنا كده قبل ما نشتغل هنبدأها بنفسانه
و شكلى هشوف أيام سودا معاكم

"وبسرعه جاء دور أحلام ودخلت على أوده صغيرة جدااا

وفضلت لوحدها فيها شويه"

أحلام"لنفسها": ده أختبار نفسي ولا ايه بيشوفنى هستحمل كم دقيقه
من غير ما أحاول أكلم حد ولا انا كنت عامله قلق براه ولا ايه

"يدخل موظف ال أتش أر "hr" على أحلام ويعرفها بنفسه
فتبتسم أحلام ابتسامه بلهاء"

أحلام "فى نفسها":شكله كده عايزنى أعرف نفسي....

ما هو مكتوب فى السي فى اللى فى أيده وهو انا يعنى تعبانه فيه عشان ايه
...مش رده عليه غير لما يسألنى

ملحوظه:"كل الحوار اللى جاى ده دار بالانجليزى ولكنه سيعرض مترجم"


الموظف: عرفى عن نفسك
أحلام"فى نفسها" :
انا قلت شكله غبى وهيتعبنى معاه .. امرى لله أعرفه بنفسي
أحلام: اسمى أحلام مهندس..
اعيش مع أمى وابى وأخين وتخرجت من كلية هندسة جامعة القاهرة..
من هواياتى الرسم ونفسي أطور نفسي فى مجالات كتير اتمنى

الشغل يساعدنى فى ده... و نفسي اشتغل عشان أحس بالاستقلالية
وانى عامل فعال فى المجتمع واتمنى انى الاقى ده هنا
أحلام"فى نفسها": غيّر السؤال بأه عشان انا مش لاقيه حاجه تانيه أقولها.....
بدل ما أسمعلك شهادة ميلادى كلها والله

الموظف: قولى مميزاتك وعيوبك
أحلام: مميزاتى....انى اجتماعيه وصبورة..........
.العيوب ممكن يكون ابتسامتى المستمرة
الموظف: تعرفى ايه عن خدمة العملاء
أحلام: خدمة العملاء هى التعامل المباشر
بين الشركه والعملاء بتوعها
الموظف: طيب انتى ليه عايزه تشتغلى فى خدمة العملاء
مع ان ده مش تخصصك
أحلام"فى نفسها": يعنى هو انا لقيت غيركم عبرنى وقلت لأ
أحلام: الشغلانه ديه هتساعدنى على تنمية مهاراتى اللغويه...
غير انى بحب أساعد الناس ...
وعندكم هساعد الناس فى حل مشاكلها وكمان هاخد على ده فلوس
الموظف: طيب يا أحلام ان شاء الله هنرد عليكى خلال أسبوع
"خرجت أحلام مع ابتسامه واسعه ترتسم على شفتيها
فقد كانت كل الاسئله من المنهح زى ما ذاكرتها

من على النت الصبح........
وأول ما خرجت وجدت أستقبال حافل من الناس اللى كانوا بيبصولها بجمود.
...حيث تجمع حولها ثلاثة بنات من المعجبين...
أصدى اللى كانوا معاها متقدمين للوظيفه"

البنت الأولى : ها عملتى ايه ؟
أحلام: الحمد لله... الموضوع سهل ما تقلقوش
البنت التانيه: طب ده اول انترفيو لكى
أحلام : اه بصو الاسئله عباره عن
عرفى نفسك بالانجليزى
وقولى عيوبك ومميزاتك
عايزه تشتغلى ليه فى خدمة العملاء

البنت التالته:طب وقولتيله ايه عيوبك
أحلام : قلتله انى علطول مبتسمه
البنت الاولى والتانيه:ربنا يوفقك ويوفقنا كلنا
أحلام :يارب ...ونشوف بعض قريب متوظفين مع بعض

"وذهبت أحلام بسعاده ويقين بأن هاتفها المحمول سيرن عن قريب ويبشرها

بالخبر السعيد وانها نجحت وهتستلم العمل الجديد"

"وبعد مرور سبع ايام بالتمام"
أحلام"تحدث هاتفها المحمول": رن بأه رن انهارده أخر يوم فى الاسبوع...
رن وانا أوعدك انى هروقك من أول قبض..هجيبلك وش جديد

وهعلق فيك لعب من اللى بتنور...
"وفى أخر الليل بليل"

أحلام "لنفسها": طب أنام ولا يمكن يتصلوا...
يمكن يكون مش معاهم رصيد ..
طب يبعتولى كلمنى شكرا..
سلفنى شكرا....
يا خوفى لا فى الأخر يبعتو يقولولى عفوا لقد نفذ رصيدكم....
أصدى لقد وظفنا غيركم

"دخلت أحلام تنام وهى حزينه وحالتها مش تمام"

"وقد اتخذت أحلام القرار..بإلا تكتفى بالبحث عن وظيفة

على النت وفى الجرنال..
فقد ..قررت أن تنزل بنفسها وتواجه العدو..
أصدى الشركات فى عقر دارها"
"فهل يا ترى الشركه فعلا معهاش رصيد وستكلم أحلام بعد
شحن الرصيد عما قريب أم ستنزل أحلام للبحث

عن عمل يوم التلات وستستمر فى كتابة الأسبوعيات"







 
الاسكندراني معجبين بهذا.
مواضيع : ابن الحتة



رد مع اقتباس
قديم 18-03-2020, 03:50 PM   #4


الصورة الرمزية ابن الحتة
ابن الحتة غير متواجد حالياً

بيانات اضافيه [ + ]
 رقم العضوية : 3325
 تاريخ التسجيل :  Oct 2013
 المشاركات : 6,662 [ + ]
 التقييم :  3548
تلقيت إعجاب : 2146
 الدولهـ
Egypt
 الجنس ~
Male
 MMS ~
MMS ~
لوني المفضل : Teal

اوسمتي

افتراضي رد: أسبوعيات عاطله" الجزء الأول"




أسبوعيات عاطله "الجزء الرابع"


"ولأن الشركة ما اتصلتش وشكل احلام ما اتقبلتش, فقامت عملت سيرش على بعض
اسامى الشركات وأخذت العناوين وارقام التليفونات وقسمتهم لمجموعات وصنفتها
على حسب المناطق والطرقات وقررت أن تبدأ بمنطقة المعادى نظرا لأن بها أكبر عدد من الشركات على حسب الأحصائيات الناتجه عن هذه المجموعات"

"نزلت أحلام من البيت تحمل فلاشه وفى رجلها لبست كوتش ليساعدها على المشى, طبعت أحلام -السي في-, واشترت بعض الفايلات ووزعت عليهم -السي فيهات-"

"وبعد ان وصلت أحلام أمام أول شركه من الشركات فهذا ما كان"
"دخلت أحلام بسلام دون أن يعترضها حارس ولا أى سيكيورتى مان وتوغلت فى المكان حتى فاجأها صوت انسان "

الموظف: على فين؟
أحلام :كنت عايزه الأتش أر "HR"
الموظف: يعنى عايزه تقدمى -السي فى-
أحلام :ايوه
الموظف: بس أحنا مش طالبين موظفين
أحلام: طب ينفع أسيب -السي فى- بتاعى هنا .. يعنى لما تحتاجوا هتلاقوه بردوه مش هيضر
الموظف: لأ لما نعوز نبأه ناخد
أحلام فى نفسها: يعنى هو السي فى هيزحم المكان ولا فيه متفجرات ولا ايه
أحلام: معلش خليه عند حضرتك
الموظف: هاخده منك هرميه فى الزباله
أحلام: طب أنتم لما بتعوزوا موظفين ياترى بتنزلوا الاعلان فى أنهى جريده؟
الموظف: أحنا ما بننزلش أعلانات أنتى كل شهر كده تيجى تسألى لو فى وظايف جديده

"خرجت أحلام وهى حزينه و-السي فيهات- فى ايديها سليمه لم تنقص ولا واحد"

"مسكت أحلام الورقه المكتوب فيها عناوين الشركات..وأخذت تقرأ وتسأل الماره على أماكن الوصول لهذه الشركات وصلت أحلام للشركه التانيه فأوقفها رجل الأمن على الباب"

رجل الأمن: على فين؟
أحلام: عايزه أقابل _الأتش أر_ بتاع الشركه ديه
رجل الأمن: عايزه تسيبي -السي فى-
أحلام"فى نفسها": ماشاء الله أيه ده نفس الحوار ...هو ده بيحفظوهلهم قبل ما يشتغلوا ولاايه؟!
أحلام: ياريت
رجل الأمن:سيبيه معايا وانا هوصلهم
أحلام: أيه ده يعنى هما عايزين موظفين بجد؟
رجل الأمن: أه بصى انا عندى -سي فيهات- أد ايه

"وعرض على أحلام عشرات -السي فيهات-"


أحلام:ماشاء الله ..ما شاء الله ...كل دول عاطلين فى مصر ... ودول كلهم على وظيفة واحده

رجل الأمن: ده غير اللى أنا بطلعهولهم كل يوم

"تركت أحلام -السي فى- وسط عشرات -السي فيهات- وبذلك تخلصت أحلام من أول -السي فيهات- لعله يفك النحس ويجر وراه باقى -السي فيهات- وعلى أثره تستقبل أحلام المكالمات المطالبه بعمل مقابلات استعدادا لتسليمها الوظيفة فى أحدى الشركات"


"ورجعت أحلام تنظر فى الورقه بحثأ عن العنوان التالى .. ولكنها قبل هذا لمحت يافطة على أحد العمارات باسم أحد الشركات فطلعت أحلام لتقديم -السي فى- هناك"

"وجدت أحلام الباب متوارب فخبطت خبطتين على الباب ولم يجب أحد..فدخلت أحلام لهناك ولم تجد أى شخص فى المكان"

أحلام "لنفسها": أنا بقول أخد بعضى وأجرى أوام بدل ما يتهمونى بسرقة المكان

أحلام: السلام عليكم

"وأذ فجأة على كرسي بعيد بيلف لتظهر أمرأه"
المرأه: وعليكم السلام

أحلام: عايزه أقدم -السي فى- بتاعى لو سمحتى
المرأه: لأ ما بنوظفش بنات
أحلام"فى نفسها": أمال حضرتك هنا بتعملى ايه بالظبط...وظيفتك ترفضى البنات اللى بيقدموا -سي فيهات-


"لفت أحلام على باقى الشركات واستطاعت التخلص من خمس -سي فيهات- ولكن دون ان تستطيع حتى الدخول من الباب أو رؤية شكل تلك الشركات ...فقد كانت تُجبر على أن تترك -السي فى- مع رجل الأمن على الباب"

"وبعد ان انهت جولتها فى المعادى طلعت على العباسيه ...ليس لأنها أصابها الجنان..فهناك كما تعلمون الصرايا الصفرا أو ما يدعى المُرستان..وانما لوجود عدة وزرات فلعل الوظيفه منتظرها هناك"
"وحتى لا أطيل وأتكلم كتير...فقد رفضوا جميعا قبول -السي فى- منها وقالوا لها أنتظرى ليناير وهننزل أعلانات نطلب فيها موظفين وموظفات...إلا وزارة واحدة كانت وزارة الكهربا فدخلت أحلام الوزارة وهذا ما جرى"

أحلام: السلام عليكم
الأمن: وعليكم السلام
أحلام: عايزة أقدم -السي فى-
الأمن: لأ مش بناخد -سي فى-
أحلام"فى نفسها": هى _السي فى_ ديه كلمه قبيحة ولا انا بعرض عليهم رشوة أيه ما بناخدش –سي فيهات- ديه

"وعندما همت أحلام بالرحيل واليأس يصاحبها فى نهاية كل هذه المشاوير نداها رجل الأمن قائلا"
الأمن: أنتى معاكى ايه
أحلام :هندسة اتصالات
رجل الأمن: طيب عدى الناصيه اللى قدمنا أشترى منهم طلب ب2جنيه وتعالى أقولك تقدميه فين

"عدت أحلام الناصيه المقابله وهى طايرة من الفرحه وبعد أن أحضرت الورقه أم 2 جنيه ذهبت لرجل الأمن أوام عشان تعرف المكان اللى تقدم فيه طلب التوظيف..وبعد أن دلها على الطريق ذهبت إلى هناك وهذا ما كان"

أحلام: السلام عليكم...عايزه أقدم طلب عمل
الموظف: معاكى ايه
أحلام: بكالوريوس هندسه
الموظف: أنتى من أبناء العاملين
أحلام"متنحه": لأ
الموظف: معاكى كارت توصيه
أحلام"تنحت أكتر": لأ
الموظف: مش هينفع نشغلك

الموظف"يشير لأحلام على بعض الواقفين الذين يملاءون استمارات للعمل فى الوزاره" : بصى أهو دول أولاد موظفين بيملوا استمارات

"تمنيت أحلام لو ان الموظف لم يخبرها بهذا الكلام خوفا على صحة الواقفين من أبناء الموظفين من أن يُهد عليهم سقف المكان نتيجة النظرة الشريرة التى رمقتهُم بها أحلام الناتجه عن ألامها فى البحث عن وظيفة منذ الصباح الباكر وحتى الآن ...بل منذ سنه فاتت كمان"

أحلام"تخرج عن هدؤها قائلة بصوت مرتفع": مفيش حد يتبننى هنا"

"نظر الناس فى المكان بأتجاه أحلام ..مما جعلها تخرج على استحياء من المكان وعادت إلى بيتها تتسأل هل أخطأت أحلام أنها لم تدخل كلية دخلها أهلها قبلها..وأذا كانت والدتها معلمة واحلام لا تجيد التدريس فهل يجب أن تُضيع مستقبل الجيل لأن الوظايف أصبحت بالتوريث"


"ونظرا لأن كل محاولات أحلام باءت بالفشل ونظرا لأنها لا تجد حتى الأن فرصة عمل فهنا أقول لكم سلام ووداعا لأسبوعيات العاطله أحلام...مع الوعد بعودة الأسبوعيات أذا ما وجدت أحلام طريقة جديده للبحث عن وظيفة أو العودة فى النسخة الجديده و"أسبوعيات عامله" ... أذا حالف أحلام الحظ ووجدت الوظيفة"



 
الاسكندراني معجبين بهذا.
مواضيع : ابن الحتة



رد مع اقتباس
قديم 18-03-2020, 04:02 PM   #5


الصورة الرمزية ابن الحتة
ابن الحتة غير متواجد حالياً

بيانات اضافيه [ + ]
 رقم العضوية : 3325
 تاريخ التسجيل :  Oct 2013
 المشاركات : 6,662 [ + ]
 التقييم :  3548
تلقيت إعجاب : 2146
 الدولهـ
Egypt
 الجنس ~
Male
 MMS ~
MMS ~
لوني المفضل : Teal

اوسمتي

افتراضي رد: أسبوعيات عاطله




أسبوعيات عاطله


"كما كنت قد وعدتكم فى الجزء اللى فات بعودة الاسبوعيات

أذا ما جد اى مستجدات.. بعد الجزء اللى فات أنتهى الامر باحلام
بالشعور باليأس والأحباط فمكثت فى البيت بضع سنوات

كفت اثناءها عن البحث عن الوظائف وسط الاعلانات..
حتى انها قامت بمسح الكورسات من الهارد ديسك والقت بالعناوين
التى كانت قد جمعتها عن الشركات فى سلة المهملات...
ودفنت همها فى الالعاب "كاندى كراش" بالذات...
ولما كان يشتد عليها الأكتئاب كانت تقوم بتحميل المسلسلات
لتغطى على صوت افكارها العالي وتكف عن البكاء"



"وفى يوم ما..تقريبا كان يوم تلات...رن هاتفها على غير المعتاد..
حيث انها كانت امتنعت منذ فتره عن ارسال –السيفيهات- ...
واصبحت لا تسمع صوت هاتفها المحمول إلا فى حالة وجود
عرض جديد على المكالمات من شركة الاتصالات "



"هذه المره لم يكن عرض جديد...كانت صديقتها امانى...
فردت احلام وهذا ما كان"



أحلام: السلام عليكم..أذيك يا مونى

أمانى: وعليك السلام الحمد لله انا تمام

أحلام: عامله ايه وحشتينى كتير


"وبعد السلام واللت والعجن فى الكلام...هذا ما كان"



أحلام: ايه ده يا عم الراوى انتى بتمنتج كلامى ليه...

والله ادى توكيل الأسبوعيات لحد غيرك

"استهدى بالله يابشمهندزة هنبأه احنا الاتنين عاطلين...
أنا بس كنت عايز أوصل الناس للخبر الهام"

أحلام: ماشى خلاص احكى

"وهذا ما كان"



أمانى: بقولك... ايه رأيك تشتغلى مدرسه

أحلام: ممممم..انتى عايزنى ابوظ الجيل

أمانى: طب ما تجربى بصى هى المدرسة قريبه منك وعشان كده

انتى اول واحده جت على بالى ...
هتصل دلوقت بالمسئوله واديها نمرتك تكلمك

أحلام: لأ التدريس ده صعب ومسئوليه
أمانى: جربى لو ما عجبكيش سيبيها..خلاص هديها رقمك...سلام

أحلام"بصوت يسيطير عليه الخوف من الفشل ممزوج

بالسعاده فى وجود بشائر أمل":سلام

"ولم يمر سوى 3 دقائق ورن هاتف احلام

مره اخرى برقم غريب..وهذا ما كان"

احلام"بصوت مرعوش": السلام عليكم

موظفة: استاذة احلام...معاكى أستاذه زينات

أحلام"فى نفسها":أستاذه بعد خمس سنين خدمه فى
كلية الهندسه أبأه استاذذه..يا خسارة نظرى

اللى راح فى الثانوية العامة

ا/زينات: انتى لكى سوابق فى التدريس؟

أحلام"فى نفسها": فى مربية أجيال وتقول سوابق..
ادامك يارب هما مبوظين الجيل اهو من قبل ما ألمسه أو اجى جنبه

أحلام: لأ ديه هتكون اول مره ان شاء الله

أ/زينات: طيب عرفتى طبيعة الشغل

أحلام: ايوه...مدرسة حساب بمرتب 300 جنيه

أ/زينات: طب تمام مناسبك ولا فى مشاكل

أحلام: لأ مفيش مشاكل ممكن بس اعرف عدد الطلبه فى الفصل
وهدرس لسنه كم وعنوان المدرسه

أ/زينات: هتدرسي لتانيه ابتدائى...و....(لحظة صمت)....
بقولك تعرفى تيجى دلوقت ع المدرسه

أحلام: دلوقت حالا...طب انتوا اخركم الساعه كم

أ/زينات: تعالى قبل 2 ادامك ساعه إلا ربع

احلام: طب اجى ازاى ممكن وصف للعنوان

أ/زينات: اركبى تاكسى

أحلام"فى نفسها": وجالك قلب تقوليها وانتى هتدينى
300 جنيه يا ظالمة وكمان لسه ما اتوظفتش

أحلام: طيب تمام ممكن بس حتى اعرف حاجه مشهورة

جنبها عشان اوصف لسواق التاكسي

أ/زينات: فى مدرسة مشهورة جنبنا اسمها "اتعلم"

أحلام: اوك...سلام

" لبست احلام ونزلت بسرعه اوام...
ووقفت ميكروباص رايح الميدان وهذا ما كان"

أحلام: ممكن تنزلنى أقرب حته لمدرسة "اتعلم"

السواق"رد وكأنه ضارب برشام": وانتى ايه اللى ركبك معايا بس يا انسه
...انا ما بفوتش من هناك...انزلى اركبى حاجه رايحه المساكن

"نزلت احلام واوقفت ميكروباص رايح للمكان"

أحلام: ممكن تنزلنى اقرب حته لمدرسة "اتعلم"
السواق: اركبى

"وبعد مرور وقت من الزمان"

السواق: اللى عايزه مدرسة "اتعلم" انزلى هنا
"نزلت أحلام فوجدت فى المكان مجموعه من المدارس وظلت

تقرأ الاسماء بحثا عن اسم المدرسة المنشوده...فلم تجدها موجوده...
فلجأت لبعض الماره فى المكان وسألتهم على العنوان...
ودلوها...فوصلت إليه بسلام...وهذا ما كان"

"اتصلت احلام باستاذة زينات...واخبرتها انها امام المدرسة الان..
فخرجت لتجلبها وهذا ما كان"

ا/زينات: هدخلك دلوقت مع اتنين من مدرسين

المادة يعملولك اختبار

احلام: أوك

مدرسة1: اهلا وسهلا أنا اسمى ريهام ..مدرسة علوم

أحلام : اهلا وسهلا

مدرسة2: إلهام معاكى...مدرسة حساب

ريهام: اتفضلى قلم اهو وعندك الصبورة ..
قوليلى هتشرحى ازاى مثال زى ده

اكمل التسلسل التالى 2 4 6 .........
أحلام: هما المفروض لسه ما خدوش الجمع صح

إلهام: هو حاليا اخدوه بس المثال مطلوب شرح المثال
ده من غير استخدام لا طرح ولا ضرب

احلام: هنقول بعد ال 2 كم 3 رمينا التلاته وكتبنا الاربعه رمينا الخمسه
وكتبنا السته يبأه نكمل ازاى بعد السته نرمى ال7 ونكتب ال 8
ريهام 2: طيب ازاى تشرحى اكبر عدد مكون من 3 ارقام

أحلام: تمام هنقول ايه أكبر عدد ممكن نكتبه فى خانة الاحاد 9...
وايه اكبر عدد ممكن نكتبه فى خانة العشرات 9...
وايه أكبر عدد ممكن نكتبه فى خانة المئات 9...يبأه 999

ريهام 1: تمام

إلهام: بصى هو انتى متوتره شويه .
وكمان انتى جايلنا فى وقت ما احنا ماشيين بس اشطه عادى شغاله يعنى..
تيجى بكره ع الساعه 7:30 ان شاء الله

أحلام: اوك بس ممكن أخد الكتاب معايا
واعرف هما واقفين عند درس ايه

إلهام: اوك خدى الكتاب معاكى...
انتى هتبتدى من صفحة 42 معاهم

احلام: معلش طلب كمان ممكن اول حصة احضرها

مع اى حد بحيث انى اشوف طريقة الشرح وكده

ريهام: اه طبعا مفيش مشاكل
"رجعت احلام على بيتها ومعها الكتاب..
و.يسيطيرعليها الارتياب..
وبمخها العديد من التساؤلات ليس لها جواب..
فهل يا تُرى ستصبح مدرسة جيدة فى حساب
...أم ستواجه المزيد من العذاب
...أم ستتحقق مخاوفها وتكون سبب فى تكريه الجيل فى مادة الحساب..
أم ستنسحب وتستمر فى كتابة الاسبوعيات أو تعود لحالة الأكتئاب"







 
الاسكندراني معجبين بهذا.
مواضيع : ابن الحتة



رد مع اقتباس
قديم 18-03-2020, 07:09 PM   #6


الصورة الرمزية بتول
بتول غير متواجد حالياً

بيانات اضافيه [ + ]
 رقم العضوية : 1754
 تاريخ التسجيل :  May 2012
 المشاركات : 11,073 [ + ]
 التقييم :  5227
تلقيت إعجاب : 642
 الدولهـ
Palestine
 الجنس ~
Female
 MMS ~
MMS ~
لوني المفضل : Blueviolet

اوسمتي

افتراضي رد: أسبوعيات عاطله" الجزء الأول"



رائع جدا
ابن الحته
قرات جزئين وراح ارحع اكمل الباقي
الجزء الاول زكرني بحالي
بقعد اكتر من ساعتين ع القروبات ادور وظيفه مناسبه وما بلاقي
كل طالبيت خبرات
ابدعت بانتظار القادم


 
ابن الحتة معجبين بهذا.
 توقيع : بتول

مواضيع : بتول



رد مع اقتباس
قديم 19-03-2020, 01:11 AM   #7


الصورة الرمزية الاسكندراني
الاسكندراني غير متواجد حالياً

بيانات اضافيه [ + ]
 رقم العضوية : 2143
 تاريخ التسجيل :  Dec 2012
 العمر : 64
 المشاركات : 18,839 [ + ]
 التقييم :  5390
تلقيت إعجاب : 1653
 الدولهـ
Egypt
 الجنس ~
Male
 MMS ~
MMS ~
لوني المفضل : Blueviolet

اوسمتي

افتراضي رد: أسبوعيات عاطله" الجزء الأول"



شوقتنا يابن الحته للمتابعه
ننتظر البقيه ياغالي


 
ابن الحتة معجبين بهذا.
 توقيع : الاسكندراني

https://top4top.io/][/url]


رد مع اقتباس
قديم 19-03-2020, 06:42 AM   #8


الصورة الرمزية ابن الحتة
ابن الحتة غير متواجد حالياً

بيانات اضافيه [ + ]
 رقم العضوية : 3325
 تاريخ التسجيل :  Oct 2013
 المشاركات : 6,662 [ + ]
 التقييم :  3548
تلقيت إعجاب : 2146
 الدولهـ
Egypt
 الجنس ~
Male
 MMS ~
MMS ~
لوني المفضل : Teal

اوسمتي

افتراضي رد: أسبوعيات عاطله" الجزء الأول"



اقتباس:
المشاركة الأصلية كتبت بواسطة بتول مشاهدة المشاركة
رائع جدا
ابن الحته
قرات جزئين وراح ارحع اكمل الباقي
الجزء الاول زكرني بحالي
بقعد اكتر من ساعتين ع القروبات ادور وظيفه مناسبه وما بلاقي
كل طالبيت خبرات
ابدعت بانتظار القادم
ربنا يوفق يا بتول وتلاقى وظيفة تليق بيك


 
مواضيع : ابن الحتة



رد مع اقتباس
قديم 19-03-2020, 06:43 AM   #9


الصورة الرمزية ابن الحتة
ابن الحتة غير متواجد حالياً

بيانات اضافيه [ + ]
 رقم العضوية : 3325
 تاريخ التسجيل :  Oct 2013
 المشاركات : 6,662 [ + ]
 التقييم :  3548
تلقيت إعجاب : 2146
 الدولهـ
Egypt
 الجنس ~
Male
 MMS ~
MMS ~
لوني المفضل : Teal

اوسمتي

افتراضي رد: أسبوعيات عاطله" الجزء الأول"



اقتباس:
المشاركة الأصلية كتبت بواسطة الاسكندراني مشاهدة المشاركة
شوقتنا يابن الحته للمتابعه
ننتظر البقيه ياغالي
تحياتي ازفهااا اليك محمله ببقات من الشكر والعرفان


 
الاسكندراني معجبين بهذا.
مواضيع : ابن الحتة



رد مع اقتباس
إضافة رد

مواقع النشر


يتصفح الموضوع حالياً : 1 (0 عضو و 1 زائر)
 
أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة
Trackbacks are معطلة
Pingbacks are معطلة
Refbacks are معطلة


المواضيع المتشابهه
الموضوع كاتب الموضوع المنتدى الردود آخر مشاركة
قيادات الشيعة بعد مذبحة "أبو مسلم": "مرسى" يتحمل المسئولية كاملة.. ومؤتمر"الاستاد" تحريض على قتلنا.. نطالب "الجيش" بحمايتنا.. وما حدث تدشين لمرحلة الإبادة الجماعية.. السلطة تغمض عينها عن الأحداث قلب طفله الاخبار المحلية والعالمية 2 25-06-2013 02:55 PM
الحرية والعدالة" تتنبأ بسقوط ضحايا في "جمعة الرحيل".. و"الإنقاذ": "الإخوان" يتحرشون بالمظاهرات جيلان الاخبار المحلية والعالمية 3 08-02-2013 06:51 PM
تجدد الاشتباكات بين أهالي "الرطمة" و"الشيخ ضرغام".. وقطع طريق "دمياط - عزبة البرج" جيلان الاخبار المحلية والعالمية 2 03-11-2012 04:27 PM
بالصور فنانو "الجرافيتى" يسخرون من "الإخوان" على جدران "محمد محمود" حبيبه الاخبار المحلية والعالمية 3 20-10-2012 11:02 AM
الهيئة الشرعية" تطالب "حسان و"يعقوب" برفع قضية ضد "الرضوانى" ام لمسه الاخبار المحلية والعالمية 2 28-12-2011 01:08 PM



هذا الموقع يتسخدم منتجات Weblanca.com
new notificatio by 9adq_ala7sas
HêĽм √ 3.1 BY: ! ωαнαм ! © 2010
التعليقات المنشورة لا تعبر عن رأي لمسه مصرية ولا نتحمل أي مسؤولية قانونية حيال ذلك (ويتحمل كاتبها مسؤولية النشر)

لمسه مصريه

 
 

SEO by vBSEO ©2011, Crawlability, Inc.